2026.08.12 ӨДӨР БАРИЛГАЧИН ХУДАЛДААНЫ ТӨВИЙН ӨМЧЛӨГЧДИЙН УУЛЗАЛТ БОЛЛОО
Барилгачин худалдааны төвийн өмчлөгчдийн уулзалт зохион байгуулагдаж, худалдааны төвийн өнөөгийн үйл ажиллагаа, тулгамдаж буй асуудал, цаашдын хөгжлийн бодлого болон өмчлөгчдийн хөрөнгийн үнэ цэнийг хамтдаа нэмэгдүүлэх боломж, шийдлүүдийг хэлэлцлээ.
Уулзалтын үеэр “Барилгачин худалдааны төвийн хөгжилд өмчлөгч бүрийн оролцоо чухал” сэдвээр танилцуулга хийж, талбайн ашиглалт, худалдааны идэвхжил, худалдан авагчийн урсгал болон үл хөдлөх хөрөнгийн үнэ цэнэ хоорондоо шууд хамааралтай болохыг онцоллоо.
Талбай бүрийн идэвхжил худалдааны төвийн нийт үнэ цэнийг бий болгоно
Барилгачин худалдааны төв нь Сонсголонгийн төв зам дагуу байрлах бөгөөд барилгын материал, тавилга, тоног төхөөрөмж, интерьер, инженерийн шийдэл болон дагалдах үйлчилгээг нэг дор төвлөрүүлэх зорилготой төрөлжсөн худалдаа, үйлчилгээний төв юм.
Худалдааны төвийн барилга байгууламж, инженерийн дэд бүтэц, авто зогсоол, агуулах, байршлын үндсэн нөхцөл бүрдсэн хэдий ч зарим талбай бүрэн ашиглалтад ороогүй байгаа нь бүтээгдэхүүн, үйлчилгээний сонголт, хэрэглэгчийн урсгал болон ажиллаж буй дэлгүүрүүдийн борлуулалтад нөлөөлж байгааг уулзалтаар хэлэлцэв.
Нэг талбай хаалттай байх нь зөвхөн тухайн өмчлөгчийн асуудал биш. Олон талбай идэвхгүй байх тусам худалдааны төвийн бүтээгдэхүүний сонголт багасч, хэрэглэгчийн дахин ирэх шалтгаан буурч, улмаар түрээсийн эрэлт болон үл хөдлөх хөрөнгийн үнэ цэнэд нөлөөлөх эрсдэлтэйг онцоллоо.
Тиймээс талбайгаа ажиллуулах боломжгүй өмчлөгчид өөрсдөө бизнес эрхлэхээс гадна талбайгаа мэргэжлийн худалдаа эрхлэгчид түрээслүүлэх, бусад өмчлөгчтэй талбайгаа нэгтгэн томоохон түрээслэгч оруулах, нийлүүлэгчтэй хамтран шоурум ажиллуулах зэрэг хэлбэрээр талбайгаа эдийн засгийн эргэлтэд оруулах боломжуудыг идэвхтэй ашиглах шаардлагатай гэж үзэв.
“Барилга, засварын бүх хэрэгцээг нэг дороос”
Цаашид Барилгачин худалдааны төвийг ердийн худалдааны төв бус, “Барилга, засвар, тохижилтын бүх бүтээгдэхүүн, үйлчилгээ, мэргэжлийн зөвлөгөөг нэг дороос авах төрөлжсөн төв” болгон хөгжүүлэх чиглэлийг танилцууллаа.
Энэ хүрээнд бүтээгдэхүүн, үйлчилгээний нэр төрлийг иж бүрэн бүрдүүлэх, давхар болон бүс бүрийн худалдааны чиглэлийг оновчтой төлөвлөх, томоохон “түлхүүр” дэлгүүр, байгууллагуудыг татах, хүргэлт, агуулах, логистик болон мэргэжлийн үйлчилгээг хөгжүүлэх шаардлагатай гэж үзсэн юм.
Мөн “100 айл явахгүй — бүгдийг нэг дороос” гэсэн хэрэглэгчийн үнэ цэнийн саналыг хөгжүүлж, барилга, засвар хийж буй иргэн, байгууллагууд олон зах, дэлгүүрээр явж цаг, шатахуун, зардлаа үрэхгүйгээр хэрэгцээт бүтээгдэхүүн, үйлчилгээг нэг дороос авах нөхцөлийг бүрдүүлэхээр зорьж байна.
Хоосон талбайг эдийн засгийн эргэлтэд оруулж, хэрэглэгчийн урсгалыг нэмэгдүүлнэ
Цаашдын ажлын хүрээнд өмчлөгчдийн болон талбайн ашиглалтын мэдээллийг шинэчлэх, ажиллаж байгаа, түрээстэй, хоосон болон худалдах талбайг нэгтгэн бүртгэх, хоосон талбайн нэгдсэн түрээсийн сан бий болгох, боломжит түрээслэгчдэд төвлөрсөн байдлаар санал хүргэх зэрэг ажлуудыг зохион байгуулахаар ярилцлаа.
Үүний зэрэгцээ нэгдсэн маркетингийн кампанит ажил хэрэгжүүлэх, сар бүр сэдэвчилсэн худалдаа, үзэсгэлэн, өдөрлөг зохион байгуулах, байгууллагын борлуулалтыг хөгжүүлэх, дэлгүүрүүдийн бүтээгдэхүүн, үнэ, байршил, захиалга, хүргэлтийн мэдээллийг нэгтгэсэн цахим систем хөгжүүлэх зэрэг саналуудыг танилцуулав.
Маркетингийн ажлыг үр дүнтэй болгохын тулд хэрэглэгчийг худалдааны төвд авчрахаас гадна дэлгүүрүүд тогтмол ажиллах, бүтээгдэхүүний сонголт бүрдэх, үйлчилгээний стандарт мөрдөгдөх нь чухал болохыг мөн онцоллоо.
Өмчлөгчдийн саналыг хөгжлийн төлөвлөгөөнд тусгана
Уулзалтын үеэр өмчлөгчид худалдааны төвийн үйл ажиллагаа, хүний урсгал, түрээс, маркетинг, талбайн ашиглалт, орчны тохижилт болон менежментийг сайжруулах чиглэлээр санал, байр сууриа илэрхийллээ.
Цаашид өмчлөгчдийн гаргасан саналуудыг нэгтгэн судалж, хэрэгжүүлэх боломжтой саналуудыг Барилгачин худалдааны төвийн хөгжлийн үйл ажиллагааны төлөвлөгөөнд тусган, өмчлөгчид болон менежментийн баг хамтран хэрэгжүүлэхээр боллоо.
Мөн худалдааны төвийн нэгдсэн дүрэм, талбай ашиглалтын стандарт, ажиллах цагийн горим, үйлчилгээний стандарт, өмчлөгчдийн төлөөллийн зохион байгуулалт, нэгдсэн маркетинг болон үйл ажиллагааны тайлагналыг сайжруулах асуудлыг үе шаттай хэлэлцэж шийдвэрлэхээр санал нэгдэв.
Барилгачин худалдааны төвийн хөгжлийн гол зорилго нь талбай бүрийг эдийн засгийн эргэлтэд оруулж, худалдааны төвийг бүрэн хүчин чадлаар нь ажиллуулан, худалдан авагчийн тогтвортой урсгалыг бий болгож, өмчлөгч бүрийн хөрөнгийн өгөөж болон зах зээлийн үнэ цэнийг хамтдаа нэмэгдүүлэхэд оршино.
Барилгачин худалдааны төвийн хөгжил бол өмчлөгч бүрийн хөрөнгийн өсөлт юм.